حبيبي مش حاسس بيا .. و المصيبة ... ان غيره حاسس !!

لموضوع النهاردة اللي عايزين نتكلم فيه مع بعض شوية , الموضوع انهاردة من البنات و الستات للرجالة اللي دايما شايفين و معتقدين ان البنت سهل انها تخون او تبيع حبها , و كتير اوي بسمع و اشوف من ولاد يحكوا عن بنت سابتهم عشان واحد تاني و يفضلوا يقولوا و يحكوا عليها و انها خاينة و ازاي تنسى الوعود و الكلام الحلو اللي كان بيتقال و ... و ... و ... و انا مش هتكلم انهاردة عن اسباب الخيانة او الفراق بشكل عام لأنهم كتير لكن اللي عايزة اتكلم فيه هو اللي فالعنوان ده " حبيبي مش حاسس بيا و المصيبة ان غيره حاسس" يمكن رجالة كتير بيعتقدوا ان بمجرد ما الواحد يقول لواحدة بحبك او انه عايز يتجوزها او حتى خطبها انه كده ضمن كشاعرها و ملكها ليه هو بس , مع ان المشكلة ان مش دي الحقيقة خالص , كون انك تبدأ علاقة ده سهل جدا لكن الصعب انها تستمر , و الإستمرارية دي فن مش مجرد الحياة ماشية و خلاص , ممكن جدا يكون حياء البنت او كبريائها مانعنها من انها تطلب او تقول انها محتاجة تحس ان الحب ده مستمر و انه منتهاش لحظة ما قلت بحبك او لحظة ما لبستها الدبلة ,اغلب الردود اللي بتيجي من الرجالة فب الموضوع ده : هو انها اكيد عارفة , لو مكنتش بحبها هقولها ليه ؟ , الشغل و الشغل ثم الشغل ............... مع ان لو جيت سألت كل واحد من دول عن احساسه لما بيسمع كلمة حلوة سواء منها او من غيرها اكيد هيقولك انه بيفرح .. طب يا أخي ماتفرحها معاك بدل مترجع تغني ظلموه لما غيرك يسمعها و يقولها اللي هي محتاجة تحسه و تسمعه منك .... آه غيرك وهو انت فاكر انك الراجل الوحيد في الدنيا و ان لو مقلتش كلام حلو هي كده كده مش هتسمعه !!! خصوصا كل ما تكون البنت اجتماعية و محبوبة تأكد انها بتسمع , و في البداية لو سمعت حاجة زي دي بتيجي انت في خيالها و تفتكرك لما قلت حاجة شبه اللي سمعتها و يمكن تكلمك في لحظتها كمان او تلاقيها بتقولك انها بتحبك بدون مقدمات , و كأنها بتديك فرصة انك تقولها اللي يغنيها عن اي كلمة حلوة سمعتها من اي واحد ايا كان , ولو فعلآ حققتلها اللي هي نفسها فيه بتحس انك الراجل الوحيد اللي موجود في الدنيا و ان اي كلمة اي واحد بيقولها زي ما بتدخل بتحرج , و اقل حاجة بتعملها بعد كده بتبقى بالنسبالها حاجة كبيرة , انما لو العكس حصل و بدل ما تسمع منك حاجة حلوة سمعت انك مشغول او انك بتنتقض فيها حاجة او بتلومها على حاجة ساعتها مش بتفتكر غير حاجتين الحاجة اللي كان نفسها تسمعها و اللي قال الحاجة دي – اللي هو مش انت طبعا- و مرة على مرة بتبدي تختفي من الصورة اللي انت نفسك فضلت تمسحها بإيدك و يظهر حد تاني عرف ازاي يشبع جواها اللي انت معرفتش تشبعه و ساعتها لو قالتلك انها عايزة تسيبك يمكن تقول عليها خاينة بس هي الحقيقة حاولت معاك و مش لاقية اللي هي عايزاه .
مشكلة كمان ان الرجالة بتفتكر البنت او الست اللي بتشتغل ان كونها انسانة عملية معناه ان المشاعر عندها درجة تانية !! و ده برضو غلط تماما , عمر الشغل ماكان ليه علاقة باحتياج المرأة للمشاعر الحلوة و الأحاسيس الدافية.
يمكن مش كل بنت اولوياتها واحدة , فيه بنت اهتمامها الأول بجمالها و بعتبر مدحه علامة حبك ليها , فيه بنت اهتمامها بدراستها , فيه اهتمامها بشغلها , فيه واحدة بتهتم بالأنشطة الإجتماعية , فيه واحدة عندها موهبة و هي كل اهتمامها , فيه واحدة – او دول كتير شوية- بتحب الهدايا و بتعتبرها تعبير عن الحب ... نصيحة مني كبنت من اهتمام كل واحدة تقدر تعرف ايه بالظبط اللي هي عايزاه منك و بيه تقدر تتوج ملك على قلبها عمرها كله , مش هتخسر حاجة لو ابديت اهتمامك بحاجة بتحبها هي كمان مش لازم تبقى متفق معاها في الرأي لكن عالأقل تحس انك واخد بالك , لأن فيه غيرك هياخد باله و غيرك هيقول كلام حلو كتير , بلاش يبقى غيرك بيقولها ان عقلها عقل واحدة اكبر من سنها ب20 سنة و انت دايما تطلع آرائها تافهة , بلاش تسمع ان اسلوبها في لبسها هايل و انت مبتعلقش حتى انه حلو , بلاش يبقى فيه غيرك بيتمنى تبقى هي اول صوت يسمعه في راس السنة و انت مش فاكر حتى تقولها كل سنة و انتي طيبة ساعتها ولو برسالة , بلاش تحسسها انها مبتعرفش تاخد قرار في الوقت اللي الناس بتمدح حكمتها ... بلاش و بلاش و بلاش كتييييييير اقولك بلاش تبقى دايما في موقف الناقض خليك احسن في دور المادح لكن بنصيحة صدقني حتى لو ساعتها الدنيا كلها قالت عكس اللي انت قلته هتسيب الدنيا كلها و تسمع كلامك انت .
و عموما فيه حاجات مشتركة بين كل البنات – يلا هقولهالكم و اكسب فيكم ثواب- اللي هي التواريخ المهمة : عيد ميلادها – عيد الحب – الأعياد بصفة عامة – رأس السنة بصفة خاصة – عيد جوازكم – و بعض الأعياد الخاصة زي اول مرة اتقابلتوا – اول مرة قلتلها بحبك و كل ما كانت ذاكرة البنت قوية كل ماكان الموضوع اصعب ههههههه ممكن تفاديا للنسيان تعمله عالريمايندر بتاع الموبايل بس خد بالك من حاجة مهمة ان عيد ميلادها متعملهوش يوم عيد ميلادها نفسه , من قبلها بيومين تكون فاكره , لأن فيه ناس متخصصة تقول للبنات كل سنة و انتي طيبة من قبلها بيومين تعبيرا عن ان يوم واحد مش كفاية و ان ده حدث مهم و القرع ده فبلاش تكون انت آخر واحد قالها كل سنة و انتي طيبة في عيد ميلادها . لأن كل مرة هتفتكر عيد ميلادها هتفتكر اول واحد افتكره مهما كانت الهدية اللي جبتها و دفعت فيها دم قلبك .
الحاجات دي رغم ان فيه ناس ممكن تشوفها صغيرة او تافهة بس لما بتتراكم فوق بعضها مع شوية نقص في كلام الحب بحجة ان ياما قلنا و اللي في القلب و الكلام ده – خصوصا لو بتشوفك او بتسمعك بتقوله لبنات تانية ولو على سبيل المجاملة – ممكن في الآخر يخليها تحس ان حبك و اهتمامك بيها قل او مبقاش موجود ولو فيه واحد بيعوض ده ساعتها مش هيبقى فيه عندها اي مانع انها تكمل مع اللي حاسة انه بيحبها و بيشبع جواها كل الأحاسيس اللي محتاجة تحسها , مش واحد افتكر انه كده امتلكها يوم ما قالها بحبك و خلاص .
انا حذرتكم اهو مترجعوش تقولوا مكناش نعرف ...