البنت يا إما مسترجلة و تخاف تكلمها .. يا إما هي اللي تيجي تخبط على ضهرك و تقولك : ممكن نمرة تليفونك ؟؟؟؟؟!!!!!!!

ههههه مبتصدقوا !! يالهووووي على شماتة الرجالة !!! لأ انتو فهمتوا غلط .. و ياريت البنات اللي رفعت حاجب دي تنزله تاني ... ده مش رأيي يا جماعة ... بس دي حاجة سمعتها على لسان واحد من يومين كده ... .. خصوصا ان الواد ده يادوب لسه خاطب من شهر !! يعني المفروض الفترة اللي مبيجيش زيها بعد كده مهما حصل !! المهم بعد الجملة دي سألته و قلتله ليه يعني بتقول كده ؟ قاللي : امشي في الشارع تلاقي النوعين دول , المسترجلة دي ماشية مش شايفة قدامها و تحسي انك لو كلمتيها هتطلع مطوة تغزك بيها !!! يا اما تبقي ماشية تلاقي اللي تطلع من تحت الأرض و تلف و تدور عشان عايزة التليفون .
فطبعا اتحمأت عالبنات و قولتله : مش معنى ان البنت جد و محترمة انها تخوف ! قاللي : اكيد طبعا بس ماهي المشكلة مش في انها محترمة ... و ضحك ضحكة واحد يا عيني مصدوم ... و قاللي طب انا هسألك سؤال : انتي لو مخطوبة ممكن تقلعي الدبلة من ايدك شهر من نفسك كده ؟ فقولتله : لأ طبعا طالما مش عايزة البني آدم ده هقوله في وشه .
و حكالي حكاية :
قاللي ان فيه اتنين مخطوبين بعد ارتباط و معرفة اكتر من 4 سنين في الكلية و اول مخلصوا اتخطبوا و بعدين اتخانقوا على حاجة تافهة جدا و قعدوا شهر مش بيتكلموا , و بعدين عرف من ناس اصحابها انها قلعت الدبلة من ساعتها – مع العلم انها هي اللي خلت اصحابها يقولوله كنوع من الضغط عليه عشان هو اللي يروحلها .. كيد النسا بقى - و فعلا راح و كلمها و اتفاجىء باللي مشافهوش منها طول السنين اللي فاتوا .. قالتله : انا سألت و خدت رأي ناس كتير و قالولي انك هتتعبني اوي .. اذا كان دلوقت و على حاجة هايفة قعدت شهر و مكلمتنيش امال لو اتجوزنا هتعمل ايه ؟ هتسيبلي البيت ؟ و بعدين انت عصبي اوي .. انت لازم تتغير ... و علاقتك بربنا اليومين دول مش اوي و ده مينفعش .
و سكت , و حسيت ان الكلام كله مصايب !!!!!!!!!!!!
1) شهر !!!!!!! دي كانت اول كلمة قولتهاله ... ازاي ناس بقالها سنين بتحب بعض يستحملوا شهر متخانقين !!!!!!!!!!!!!!!!!! 30 يوم !!! ده ولا حتى 3 ايام !!!!!!!

2) تاني مصيبة هي الناس اللي دخلت في النص دي , اكبر مصيبة بتحصل ان يبقى في مشكلة بين اتنين و تتحول لمشكلة رأي عام !! و كل واحد يفتي بقى و يقول رأيه !! و طبعا مش بييجوا على الطرف اللي مش موجود فبيسخنوا الموضوع اكتر .. و نادرا ما يبقى فيه ناس بتهدي الجو و تقول كلمتين حلوين في حق الطرف التاني ده , ليه كل ده ؟ المشكلة حصلت , بعد الأمور متهدا الأتنين يتكلموا مع بعض و يفهموا بعض وجهات نظرهم , و معلش انا كنت غلطان في كذا ... و انا اسفة مكنتش فاهمة ان قصدك كده .. و اتنين بيبسي و خلصت الحكاية .... مع الوقت الأتنين بيبقوا فهموا طباع بعض وكل واحد فهم ايه اللي بيزعل التاني و مش بيعمله و بتقل الخلافات الهبلة اللي بتبقى في بداية اي ارتباط , انما اروح لواحد متخانق مغ مراته و كفران من الجواز , و اسمع واحدة طهقانة من العيال و من جوزها قبل العيال .. و يكرهوني في الجواز ليه !!!
و ماشي مش عيب اخد رأي حد قريب مني بس مجرد رأي .. انما يبقى اللي بيقوله هو الصح حتى لو كان الشخص ده مش فاهم الصورة كاملة يبقى لأ .

3) تالت مصيبة : " انت لازم" .. ايه لازم دي انشاءالله ؟؟؟؟؟ اكتر كلمة بتجيب العند هي لازم دي ... على اساس ايه لازم يعني ؟؟؟ حتى لو حد فيهم شايف ان في حاجة غلط او تصرف غلط ممكن يطلبها بإسلوب احسن من كده .. اي حاجة غير انها تكون أمر !!!! لأ و كمان بنت هي اللي بتأمر راجل !! و معلش يا بتوع المساواة معروف جدااا ان ربنا قال ان الست تسمع كلام جوزها ... مش العكس .. و ربنا مش يقولنا حاجة و احنا نعمل عكسها و نقول مساواة ... لأ بقى مش هي اللي تقوله انت لازم دي !!! , طب انا هقولكم حاجة اعملوها معايا دلوقت , اعمل ايدك على شكا مسدس زي ما كنا بنلعب زمان , و اعمل انك هتضرب الكومبيوتر بالمسدس , خد بالك كده ... هتلاقي انك حاطط صباع هتضرب بيه الشاشة و فيه 3 صوابع بصين ناحيتك انت !!!!!! فهمت ؟ يعني انت سهل تكون شايف عيوب اللي قدامك بس مش واخد بالك ان ده بيفضح عيوبك انت كمان يا فالح .. فياريت نراجع نفسنا قبل منعدل على حد .


4) رابع مصيبة : لأ دي كارثة و بيقع فيها ناس كتيييييييييييييييييييييير اوي و سبب فشل اغلب الجوازات , التغيير , تلاقي الواد ايه قاعد مع صاحبه مثلا و يقوله ايه : هي كويسة بس نكدية شوية بس و حياتك هظبتها بعد الجواز !! و هي تبقى قاعدة جنب امها و تقولها : مرتبط بأهله اوي يا ماما بس على مين انا هخليه يطلقهم بالتلاتة بعد الجواز !!!! و يتجوزوا لا هي بتتغير ولا هو بيتغير !! و تكبر المشاكل .. ما هما كانوا اصلا دخلين الجوازة دي عشان يربوا بعض .. و هو في دماغه جزمة انه يغيرها و هي في دماغها جوز جزم انها تغيره !!!!
ده جواز ده !!!! الجواز ده انك تقبل شريك حياتك زي ما هو كده , بعيوبه قبل مميزاته , و تعرف ان الشخص ده اللي هتكمل معاه زي ما هو كده , عاجبك ماشي كمل , مش عاجبك او مش قادر يبقى مع السلامة من اولها , انما تفتكر انك هتغير حاجة لأ ... خصوصا لو عملت زي الفالحة اللي بحكي عليها و قلت لازم .. تبقى بتحلم !!!!
يا تقبله زي ما هو يا بلاش .

5) خامس مصيبة هي الحكم على علاقة حد بربنا ... و هنا احب اقولك كلمتين بس ( خليك فنفسك ) , انت مين عشان تحكم ان دي ملتزمة و بتاعة ربنا ولا لأ , و انتي مين عشان تحكمي هو يعرف ربنا ولا لأ !!!!!
لو عملت / عمل كل اللي بتحبه / بتحبيه قدامك .. هو ده المقياس !!!! ممكن جدا يكون الأنسان قدامنا حاجة و بعيد حاجة تانية خالص .. متهيألي اضمن حاجة انك تحس ان الشخص ده بيعمل حساب ربنا في تصرفاته , و دي يمكن بيعرفها الناس اللي كانت تعرف بعض قبل الأرتباط .. لكن كل انسان بيغلط و كل انسان بتجيله فترات نشاط و حرارة روحية و فترات فتور .. في الحالتين محدش يحاسب حد .. ربنا اللي بيحاسب .. ممكن تنصحه اه بس من غير أوامر او انك تحسسه انه اقل منك .

**** و عايزة اقول نصيحة للبنات بالذات اللي بيبقوا محبكينها اوي , يعني الولد ده قاللي ان البنت دي قالت لخطيبها : انا بحب ربنا جدا ولو حسيت في يوم اني هحبك اكتر منه انا هدوس على قلبي بالجزمة !!!!!
يا بنت الناس : انا عارفة ان البنت بتدور على واحد ملتزم من الآخر عشان تضمن انه مش هيعمل حاجة غلط في حقها من وراها – ميبصش بره يعني – و ده معناه ازمة ثقة فيه و في البنات اللي حواليه , بس مش معنى انه بيمشي باصص في الأرض و هو معاكي انه من وراكي بيعمل كده ّّّههههههه جتك 60 خيبة !! و مين قالك انك لما تعدلي على علاقته بربنا دي حاجة كويسة ؟ ده اكبر دليل ان علاقتك انتي بربنا اللي مش صح !!
و كون ان واحدة تبقى فاهمة ان ربنا عايزها بتحبه هو بس .. تبقى مش فاهمة حاجة و البعد عنها غنيمة بصراحة .
و ده كان رأيي اللي قولتهوله في الآخر ان هو الكسبان لو سابها , و عارفة ان فيه بنات دلوقت بتقول : يعني هو اللي كويس اوي ؟ انا كمان قولتله كده بس هو قاللي انه عارف انه مش كويس اوي ولا حاجة ومش مطلع نفسه ضحية و مع ذلك هي اصرت على كلامها ده .

اللي عرفته بعد كده ان الشخص ده ساب البنت دي .. و المفاجأة الأكبر بالنسبالي هي ان اللي حكالي هو الخطيب نفسه !!!!!