التقل في البنت طبيعي .. اتقلي يا حبيبتي بس بلاش تطفشيه

نظرا لتعدد الشكاوي من الرجالة ضد البنات التقيلة , واضح ان الموضوع مجنن الرجالة اوي , و تلاقي الشكوى يا عيني طالعة من جوه قلبهم , مع ان البنت ممكن تكون طبيعتها كده – و يمكن برضو بتصطنع يعني – بس يا ايها الرجال اعذروا البنات , قولولي ليه ؟ اقولكم , المشكلة عندنا في الشرق بصفة عامة ان التقل بيتزرع في البنت من صغرها , لأن الراجل الشرقي مش بيحب الحاجة السهلة و بيزهق بسرعة , و ده خلى كل ام تعلم ده لبنتها اول ما تبتدي تبقى آنسة أمورة كده انها تكون تقيلة و صعبة و تطلع عينه من الآخر – مش هينفع اقولكم التعاليم المبكرة للأمهات حفاظا على كيد النسا من الإنقراض و كده كده مش هيفيدكم في حاجة – ف البنت يا إما تتشرب الموضوع و يبقى جزء من طبيعتها , او تحاول تمارسه حتى لو هي مش محترفة فيه اوي , المهم انه بيتحول بالنسبالها لواجب انثوي يجب القيام به على اكمل وجه.
و سواء البنت خفيفية او تقيلة كده كده مش عاجب الرجالة !!! يعني لو تلقائية و بسيطة و بتعبر عن مشاعرها بسهولة و بصراحة تبقى سهلة و مملة و ممكن يتقال كمان مش موثوق فيها , ولو تقيلة و مطلعة عينه تبقى باردة و مبتحبوش و رخمة !!!!!!!!!!!!!
طب ايه الحل بعد ما حطيت العقدة في المنشار كده ؟؟؟ بصوا مفيش حل موحد لكل الناس , لأن ده بيعتمد على شخصية البنت و الراجل , يعني لو هو بيحب الإهتمام الزايد هيفرح بواحدة بتعبر عن مشاعرها بسهولة و اكيد مش هيبقى مبسوط مع واحدة تقيلة عليه , و العكس صحيح لأن فيه رجالة بتحب البنات اللي بتنشف ريقها !!
ولو ان نوع البنات التقيلة دي اصلآ على وشك الإنقراض !! انا مش عارفة تقل ايه اللي بتشتكوا منه ؟؟؟؟ دي البنات هي اللي بتجري دلوقت ورا الرجالة – حاجة تكسف – لدرجة ان النوع اللي مش بيجري ده خايف يعنس في الآخر ..... ربنا يسترها ..... المهم ( و الكلام للبنات) خليكي ناصحة و شوفي هو من انهي نوع و خير الأمور الوسط برضو يعني خللي التقل زي الملح مش زيادة و لا ماسخ ;)
يعني بلاش يبقى زيادة اوي لدرجة تخنق ( والكلام للكل بقى) , ماهو برضو الرجالة لازم تراعي حاجة مهمة ان البنت بطبيعتها – بغض النظر عن البنات حاليا- خجولة , و صعب شوية عليها انها تقول الكلام ده من غير تمهيد , و ده بيتوقف على اسلوبك انت كراجل معاها , يعني مينفعش مثلآ هي تتجاهل خجلها ده و تيجي تقولك "وحشتني" , يكون ردك عليها " اوك " او " طيب" !!!!!!!!! رد بارد زي ده يقفلها منك جاااااااامد , و هيخليها تفكر ألف مرة بعد كده تقولك كلمة حلوة او لأ !! بلاش تبقى هي / هو جاي/ة يعتذر عن غلطة او مشكلة بسببه/ها و يكون رد الفعل برضو ان الإعتذار ده مش فارق و الموقف زي ماهو !! طبيعي بعد كده ان الطرف الغلطان ده حتى لو كرر الغلط هيفكر برضو انه ميعتذرش لأنها مش فارقة كده كده ... و ترجعوا تقولوا ده تقل !!!!!!! لأ كل واحدة و واحدة بيحصد من الطرف التاني ثمار معاملته معاه , و فيه حكمة صريحة بتقول " فاقد الشيء لا يعطيه " اذا انا مش حاسة ان كلامي او مشاعري بتقابل بإشباع ليا انا كمان لمشاعري , بعد كده مش هلاقي مشاعر اصلآ عشان ابقى بعبر عنها او لأ , و اذا قلت مرة " بحبك" و لقيت رد رخم و قعدت فترة و قلتها تاني و برضو الرد وحش , لما هييجي الوقت اللي الطرف التاني مستنيها مني , انا هبقى خلاص بطلت احسها مش بس بطلت اقولها !!!!!!!! و دي المشكلة الكبيرة , ان فيه ناس بتعتقد ان الإرتباط هو نهاية المشوار و ان خلاص فلان او فلانة دي بتاعتي , بس لأ , الإرتباط ده البداية و الحب ممكن يقل و ممكن يزيد , ف التقل الزيادة ممكن يوصل انه المشاعر قلت او اختفت , و كل ده ممكن يتعكس تماما اذا كان فيه تعبير عن المشاعر الحقيقية في التوقيت المناسب و بالأسلوب المناسب للطرف التاني , و في نفس الوقت عدم الأنانية , و مراعاة الطرف الآخر و احتياجه العاطفي .
ف راجع نفسك جايز ردود افعالك هي اللي مخليه الطرف التاني يتقل كنوع من العقاب يعني ... و إعمالآ بالرأي اللي بيقول : " اتقل على حبيبك و ارميه في بلاعة .. يرجعلك مستحمي و ف بقه نعناعة "
التقل حلو آه بس بحدود ... عشان أم كلثوم كمان قالت للصبر حدود ......