يفتح الستار على موال كل يوم
انا راجعة من الشغل لقيت ماما فى اوضتها بتتفرج على التليفزيزن و متنكدة
انا : انا جيت يا مامتى ، ايه مالك مين زعلك ؟؟
ماما : محدش زعلنى ، بنت خالتك خطوبتها الاسبوع الجاى
انا : الف مبروك و الله هاروح بقى اكلمها اباركلها ، بس هى دى حاجة تزعلك
ماما : بنت خالتك اصغر منك ب 6 سنين و خلاص هاتتجوز
انا : طيب يا ماما و ماله كل شىء قسمة و نصيب ، و انا لما هايجيلى نصيبى هاتجوز
ماما : يا بنتى نفسى اشوف ولادك قبل ما اموت
انا : يا دى النيلة يا ماما بعد الشر عليكى و بعدين هو انا كل يوم لازم اسمع نفس الموشح
ماما : كلامى مش عاجبك واقف فى زورك ، يا بنتى العمر بيجرى ، و انا مش هاعيش قد ماعشت ، عايزة اطمن عليكى
انا : يا ماما مش يمكن اموت انا الاول و بعدين لو ربنا رايد انى اتجوز هاتجوز
ماما : يا بنتى الملافظ سعد بعد الشر عليكى ربنا يجعل يومى قبل يومك ، بس اخرجى شوفى الناس ، اتفسحى ، خلى الناس تشوفك فى الشارع
انا : يعنى امشى احط يافطة مطلوب عريس ؟؟؟؟؟ انتى عارفة انى مابحبش جواز الصالونات و ساعات بوافق اشوف اى عريس علشانك
ماما : مهو طول ما انتى قاعدة بوزى فى بوزك او قاعدالى على المخروب اللى اسمه النت مش هاتتجوزى
انا : استغفر الله العظيم مال النت و مال الجواز
ماما : صحابك كلهم اتجوزوا ووولادهم بقوا فى حضانة و ابتدائى ، يعنى بذمتك انتى مش احلى من عبير ام ضب ، و لا هناء اللى دمها زى السم
انا : يا ماما القرد فى عين امه غزال انتى علشان ماما شايفانى حلوة ، و بعدين لما يجيلى عريس كويس هاوافق علطول
ماما : طيب ايه اللى ماعجبكيش فى الدكتور مجدى ؟؟؟؟؟؟؟؟
انا : دكتور مجدى مين ؟
ماما : الدكتور اللى جالك و انتى فى 3 ثانوى
انا : يا خرابى يا ماما انتى لسة فاكرة دة الموضوع دة عدى عليه زمن يكاد يكون قرن و انا كنت صغيرة و كان عندى 17 سنة و هو عنده 33 سنة
ماما : اه صحيح دة من زمان و انا كمان حتى رفضته ، طيب ليه ما اتجوزتيش ياسر ؟؟؟؟؟
انا : يا ماما انتى بتكلمينى عن حاجات حصلت ايام الجامعة ليه ؟؟؟؟؟؟؟
ماما : طيب ليه ما اتجوزتيش محمد ؟؟؟؟؟
انا : محمد مين ؟ اللى بيعزف فى الاوبرا ؟؟؟؟؟؟
ماما : ايوة هو دة
انا : انتى ناسية انك قلتى لا علشان علطول ايده فى مناخيره
ماما : اه الواد دة كان مقرف اوى
انا : انسى بقى و اقفلى على الموضوع دة
ماما : طيب يا بنتى اخرجى علشان خاطرى الناس بتتجوز كدة
انا : يا ماما ارحمينى انا زهقت بقى من السيرة دى ما انا بخرج بس مش معقول هاخرج كل يوم ، انا بحب البيت اكتر و بزهق من الخروج
ماما : طيب روحى عند سالى
انا : يا ستى كنت عندها من اسبوع هى صورة و بعدين البنت متجوزة عايزة تكون براحتها فى بيتها و مش معقول كل ما اروحلها تتصلى بيها تقوليلها ، لو بنتى رجعت من غير عريس هازعل منك ، هو حد قالك انها خاطبة
ماما : انتى خلاص مابقيتيش عايزة تسمعى منى كلمة ، طيب اخوكى عايز يتجوز
انا : طيب و انا مالى ، مايتجوز انا دخلى ايه ؟؟؟ و بعدين يا ماما دة اصغر منى بسنة و يا دوب مرتبه مكفيه و شقته فى مكان مهجور ، و اصلا هو مش مرتبط و لا فيه واحدة فى دماغه مين اللى قالك انه عايز يتجوز ؟؟؟
ماما : محدش بس انا عرفتها لوحدى ، انا يا ضنايا حاسة بيه و عارفة
انا : لا حول ولا قوة إلا بالله طيب انا مليت بجد من الكلام دة و عصبت انا هانزل هاروح عند عبير عايزة حاجة اجيبها و انا جاية ؟
ماما : هاتى عريس و انتى جاية
و يسدل الستار و انا بشد فى شعرى و بفكر انتحر